Scho glii isches ume so wit u mir hei ir Mehrzwäckhalle z Obergoldbach üses Jahreskonzärt mit üser CD Vorstellig "Guldige Herbscht".

Es wartet o dieses Jahr ume es schöns Rahmeprogramm uf auii Bsuecherinne u Bsuecher.

Es würd üs fröie euch bi üs am Konzärt dörfe z begrüesse.

Fritig 17. Januar isch leider scho usverchouft, aber Samschtig+Sunntig hets no freii Plätz.

Reservationen telefonisch ab 6. Januar 2025, Montag bis Freitag 18:00 bis 20:00 Uhr bi Felicia Liechti unger 079 544 69 08

Im Juni 2023 hei mir bi Walther Fölmli z Adligenswil üses erschte Lied ufgno u der Startschuss gmacht für üsi CD,knapp 18 Mönet speter chöi mir das Stück zum verchouf frei gä.

Es isch e intensivi Ziit gsi mit viu gfröits, aber o weniger guets.

Mir hei viu müesse üebe u probe das mir de z Luzern das o chöi ufnäh,t Miriam hets nid immer eifach gha...

Stütze, nid schnuufe, dobe blibe, nomau u nomau...das hei mir mängisch ghört.

Aber am Schluss hett sich die Arbeit meh aus nume glohnt.

Es isch glich schön di CD dörfe ide Häng z ha u im Auto e nöii Musig z lose, u chli i Gedanke zrug dänke a di Momänte im Tonstudio wo o sis guete hett gha,so wi denn wo mir Schafroth Ädus Geburtstags Turte hei chönne ässe nach der Ufnahm.

Mir möchte üs bi aune ganz härzlich Bedanke wo irgend uvene Art u Wis ire Bitrag gleischtet hei für di CD.

Passend uf t Wiehnachtsziit chame die grad hie uf der Homepage bsteue, es super Gschänk für ungerä Wiehnachtsboum...

Üse President der Dänu Blum u t Miriam Schafroth hei no iz Studio vo Radio BEO dörfe ga u dert üsi CD vorsteue.

Si hei e chline Iblick i üse Jodlerklub dörfe verzeue u es paar Stück vor CD dörfe abspile.

O dert e grosse Dank am Radio BEO Team.

I däm Jahr  isch üses jährliche Adventskonzert chli spezieller gsi aus süsch, hei mir doch üsi neui CD "Guldige Herbscht" dörfe zum Verchouf frei gä.

T Chiuche z Grosshöchstette isch bis ufe letscht Platz bsetzt gsi, dass hett üs natürlech sehr gfreut u hoffe das aui Lüt no es Plätzli hei gfunge wo hei wöue cho lose.

Mir hei Vorträg mitem Klub,sowie diversi Chliiformatione, zum beschtä gä,natürlech hett t Wiehnachtsgschicht vor Miriam nid gfäuht. Diesmau isches haut chli meh um t erstehig vor CD gange.

Der Walther Fölmli wo si Teil derzue natürlech o hett Biitrage, u die ganzi CD hett ufgno, isch o im Publikum ghocket.

Er hett o no es paar liebi Wort zu üsem Tontreger gseit u mir hei üs bi ihm no mit emnä Presäntli chönne bedanke.

Merci Walti für dini grossartegi Arbeit u dini Geduld mit üs...  

Nachem Konzärt isch der Verchouf offiziel los gange, währ auso no nid weis was zur Wiehnachte schänke... üsi CD chame hie uf der Homepage grad zu sich Hei bsteue.

Mir wünsche öich ganz e schöni u besinnlechi Adväntsziit.

Am Fritig si mir ir Linde iglade gsi zur CD Toufi vom Jodlerquartett Alpenrösli Heimenschwand.

Es isch e sehr guet bsuechte Aabe gsi u t Mehrzwäckhaue isch vou gsi,dass isch doch geng schön vor so amne Publikum z singe.

Es si wunderschöni Vorträg gsi vom Quartett Alpenrösli u vom angere Gaschtklub de Edelwyss-Stärnen Grindelwald.

O mir hei üses beschtä gä um dä wunderschön Aabe chönne häufe z gstaute.

Es isch viu glachet worde, t Verpflegig isch wunderbar gsi u t Ungerhautig o top,was wot z Jodlerhärz no meh aus so e wunderbare Alass.

Mir Gratuliere em Jodlerquartett Alpenrösli Heimenschwand zu Ihrer wunderschöne CD u mir gseh üs sicher bire angere Glägeheit..

Meh Fotos unger "Üser Uftritte u süsch Heugeli"

Am Samschtig si mir vom Jodlerklub Burgfründe Rotheburg, aus Gaschklub,zu Ihrem "Jodler Obe" iglade worde.

T Mehrzwäckhaue isch sehr schön zwäg gmacht worde u o sehr guet bsetzt.

Es isch immer schön vor so viu Publikum z singe, dass hett sicher o zumnä glungene Jodler Aabe bitrage.

Mir si o vor Chuchi sehr fein verpflegt worde,es het a nüt gfäut.

Bi Örgelimusig umne feine Kaffi isches luschtig zue-u härgange,bis mir töif ir Nacht der Heiwäg vo Luzärn hei aträtte.

Dä Burgfründe Rotheburg wette mir ganz härzlich danke für dä schön Aabe u verblibe mit beschtä Jodlergrüess.

Am Samschtig der 19. Oktober hei mir mitem Jodlerklub uf Langnau chönne ga der Mätsch luege vo de SCL Tigers gäge Kloten.

Grosshöchstetten isch z Gaschtdorf gsi u mir hei bim Wettbewärb gwunne u hei so Billiet übercho.

Es isch ä glungnige Alass gsi, o we Langnou hett verlohre..

Ir Pouse hett üse Sekretär Peer Moser no es Interview dörfe gä u chli öppis verzeuue über üs.

Am schluss hei mir no auui ache uf z Isch chönne ga es Gruppefoto mache, u kenne isch usgrütscht uvem glatte Ungergrund..

Merci viu mau de SCL Tigers für de glungnig Aabe, mir heis sehr luschtig gha u es isch e tolle Vereinsusflug gsi.

Wi angeri Jahr o, si mir am Donnschtigabe vor der Viehschou z Konolfingen i Stau vo üsem Presidänt, em Dänu Blum, i Stau ga Singprob ha. So hei mir di wunderbahre u suubere Chüe chönne beguetachte u öppe no chli Fachsimple weli di schönschti isch...

Zwüschedüre hei mir natürlech ono öppis gsunge, es passt ja niene besser häre aus bi de Chüe.

Mit Spiis u Trank si mir natürlech o verpflegt worde u es hett für jedä öppis gha,merci viu mau.

Dänu...mir wünsche dir für t Schou guets Glinge u witerhin viu Glück i Huus u Hof.

O i däm Jahr dörfe mir zu angerne Jodlerklüb a Ihres Konzärt ga singe, was üs immer sehr freut u mir o sehr gärn mache.

So chöme mir o chli zum Huus us...

Das währi am 2. Novämber bide Burgfünde Rothenburg in Luzern...

Herzlich Willkommen bei den Burgfründe Rothenburg - (burgfruende-rothenburg.ch)

u när simer am Fritig der 15. November no Gascht bir CD Toufi vom Jodlerquartett Alpenrösli Heimenschwand.

Es würd üs doch freue we mir z einte oder angere bekannte Gsicht würde gseh.

Am Donschtig Aabe si mir no mau uf Adligenswil/Lu zu Walter Fölmli iz Tonstudio für üses letschtä Lied uf CD ufznä.

Ja der Schluss isch ja bekanntlich am schwirigschte u das hei mir o z gspühre übercho.

Mir hei viu müesse üebe,dass mir das Lied no fählerfrei chöi ufnäh.

Aber es hett säch uszauut, u mit viu Konzentration u Disziplin hei mir die Ufnahm im Chaschte gha.

Merci Walti Fölmli für di tolli Zämearbeit über di Ziit.

We aues nach Plan louft, isch di CD ändi November erhältlech.

Passend uf t Wiehnachte... 

Da mir ume mau es aktuells Klubfoto bruche u mir für üsi CD o es schöns Cover wettä ha,hei mir beschlosse im Herbscht vor t Kamera z stah. Es isch no schwirig gsi das z Wätter am Donnschtig Aabe mau het mitgmacht.

Aber am 19. September het säch Petrus vor beschtä Site zeigt u mir hei üs useputzt, oberhaub vo Grosshöchstette besammlet.

Es si schöni Ufnahme entstande u aues hett zäme passt.

Merci viu mau dene Lüt wo Fotos oder Videos gmacht hei oder süsch hei bitrage zu dene schöne Biuder.

Wi au Jahr, am dritte Sunntig im September, hett der Jodlerklub mitghoufe t Chiuchepredigt am Bättag Musikalisch z umrahme.

Es si viu Lüt it Chiuche cho u mir hoffe das mir mit üsem Jodelgsang der Gottesdienscht chli hei chönne berichere, u de Bsuecher hei chönne e Freud mache.

Nach der Predigt hets no es Apero gä, wo mir o hei dörfe teilnäh, merci viu mau.

Am Sunntig hei mir bi Kohler's z'Niederhünigen üses all Jährliche Brätle gha, mit der ganze Jodlerfamilie u aune wo üs am Konzert 2024 ungerstützt hei.

Salat u es feins Steak vo Wüthrich Tinu, mhh...fein isches gsi u kenä hett mit hunger hei müesse.

Z Wätter isch ume mau perfekt gsi u das hett sicher o zumnä gmüeliche Sunntig bitrage.

Mit vouem Mage hei mir de öppe ono eis oder zwöi gsunge u so e schöne Namittag chönne gniesse.

Merci viu mau Kohler's das mir au Jahr zu öich dörfe cho u dir der Schopf u der Platz zur verfüegig steuet für üs Jodler.

E grosse Dank geit o a aui Häuferinne u Häufer vo üsem Konzärt, mir hoffe dir sit o im Jahr 2025 wieder derbi.

Wi au Jahr hei mir mitem Jodlerklub Schüpbach wieder use Brätliaabe gha, dasmal si mir ume bi Steiner Dävu z Grosshöchstette gsi.

Es Steak vom Grill u e feini Züpfe, meh bruchts bi üs Jodler nid zum Z'nacht.

Chli Singe u Jutze u der Ustusch unger Jodlerkamerade, dass hett zum glungnige Aabe bitreit wo mir bim Dessert u Kaffi gmüetlech hei la usklinge.

Merci viu mau  Steiner's für z Gaschträcht u z sponsere vom Dessert.

Am 27. Juni hett t Nadja Schafroth ihre 30. Geburtstag chönne fiire, wo si grad der ganz Jodlerklub hett iglade.

So hei mir üsi Singprob grad bi Schafroth's Daheim im Oberthal düregfüehrt.

A däm schöne Summeraabe u dere tolle Ussicht isch das doch e glungnegi Abwächslig gsi zu üsere normale Singprob.

"Bärnbiet du mi liebi Heimat, schöner cha nes niene si" wird im Lied vom Jakob Ummel so schön gsunge, u ja är hett scho rächt gha.

Mit dere Ussicht isch z Singe grad viu schöner gsi, u fasch vo säuber gange...

Nach der Prob si mir no Verchöschtiget worde vor Nadja mit Wurscht u Züpfe u o Verdurschte hett niemer müesse.

Merci viu mau für dä schön Aabe.

Am Sunntigmorge hei mir uf der Marbachegg mit der ganze Jodlerfamilie der Buurebrunch gnosse.

Ja, z Wätter isch o scho besser gsi u drum hei mir der Wäg ueche zum Restaurant mit der Gondlä bewäutiget.

U o dobe isch t Ussicht nid grad berrauschend gsi,derfür hett z' Zmorgebuffet üses Härz la höcher schlah.

Züpfe, Fleisch u Chäs bis gnue derzue no e feini Röschti,es het für jedä öppis gha.  

Viele Dank em Team vor Marbachegg für dä super Service.

Es Lied u e Jutz hei mir mit vollem Mage glich no wöue singe, u so hei mir der Sunntig la usklinge u am Namittag ume der Heiiwäg aträte.

Mir wettä üs ganz härzlech bi au denä fliessige Sammler bedanke, wo ihri Migros Vereinsbon für üse Jodlerklub igreicht hei.

Sagehafti 1980 Bon's sis das Jahr gsi,wo üs ä schöne Zuestupf it Vereinskasse git. 

Danke,Danke,Danke

Üse Wener Brunner het am Samstig mit sire Manuela z Ja-Wort gä ir Chiuche  Grosshöchstette. 

Dert isch o der Jodlerklub iglade gsi u het das Fescht Musikalisch umrundet.

Nach der Chiuche u em Spalier stah hei mir o no dörfe ga z Apéro gniesse.

Bi beschtem Wätter u feinem Ässe si mir richtig Verwöhnt worde.

Liebe Werner u Manuela....

mir wünsche öich nume z Beschte uf öiem gemeinsame Läbeswäg, u viu schöni Momänte zäme.

Mir Danke viu mau das mir dä Tag mit öich hei dörfe Fiire. 

Meh Fotos unger `"Üser Uftritte u süsch Heugeli"

Am Sunntig der 10. März si mir ume mau uf Adligenswil/Lu zum Walter Fölmli ga zwöi Lieder ufnäh, somit nimmt üsi CD langsam gstaut a u isch am wachse.

Im grosse u ganze hei mir die zwöi Stück flott ufgno, da üs t Miriam tipp topp vorbereitet het.

So si mir am früechere Aabe ume daheime gsi,u hei der Sunntig no chönne gniesse.

Merci Walti Fölmli hesch du dir Ziit gno, u mit üs witer a üsere CD z'schaffe.

Mir gloube es chunnt guet.

Scho ume isch es Intensivs u Interessants Jodlerjahr düre u isch mit üsere Houptversammlig rückblickend abgschlosse worde.

Nachemne feine Ässe het üse Presidänt t Versammlig pünktlech eröffnet u mitem Traktandum 1 chönne starte.

Es het mau meh u mau weniger z diskutiere gä, aber es isch doch zügig vorwärts gange.

Mitemne schöne Jahresrückblich hei mir z vergangene no mau chönne revue passiere, wo doch einiges los isch gsi im letschtä Jahr.

Ahh... u der Name vo üsere CD heimer ono chönne bestimme....

Peter Thierstein isch 25 Jahr im Bernisch-Kantonaler Jodlerverband u somit zum Veteran geehrt worde, u bi üs ar Versammlig zum Ehremitglied vom JK Grosshöchstetten. Merci viu mau was du i dere Zit gleischtet hesch füre Klub,u was du i Zuekunft no aues machsch. Uf di nächschte 25 Jahr...

Sit emä haube Jahr singt der Dänu Schmutz vo Mirchel bi üs im 2. Bass.

Höchschti Ziit di offizell i üsem Klub ufznäh.

Schön isch ume e junge Maa meh i üsne Reihe,wo fröid am Singe u Jutze hett.

Dänu, mir wünsche dir viu gmüetlechi Stunde bi üs u dases no mängisch luschtig zue u här wird ga.

Am Wucheänd vom 19. - 21. Januar hei mir z’Obergoldbach üses Jahreskonzärt gha.

Für üs Jodler hets scho am Fritignamittag agfange, mit zwäg mache u schmücke vor Mehrzwäckhaue.

Es geit afe schnäu bis mir fertig si, jede weiss was är muess mache.

Am Aabe am 18.00 Uhr isch när Türöffnig gsi u t’Chuchimannschaft isch gwappnet gsi t’Gescht

mitemne feine z’Nacht z’verwöhne.

Am 20:00 Uhr isches när los gange - volli Konzentration - üses Konzärt het agfange.

Voreme ufmerksame Publikum hei mir üser Vorträg chönne zum Beschtä gä u zeige für was mir es

Jahr lang güebt hei.

Nöi hei verschiedeni Gaschtformatione üses Programm bericheret u diversi Chliiformatione das

musikalisch Wucheänd abgrundet. Viele härzleche Dank!

Am Sunntig nachem singe isch när no ufrume u putze ufem Programm gstange, u o hie si mir afang

schnäu u speditiv ungerwägs. De heimer nach getaner Arbeit, erschöpft aber z’fride, ufenes

erfougrichs Konzärt chönne zrügg luege.

Merci viu, viu mau aune Häuferinne u Häufer wo üs so tatchräftig ungerstützt hei,ohni öich wär das

nid müglech gsi.

U itz heissts ume üebe, üebe u no mau üebe für z nächschte Konzärt im 2025

Bis gli…

Bilder unter: Konzert 2024 Jodlerklub Grosshöchstetten (bern-ost.ch) oder bi üser Homepage unger `"Üser Uftritte u süsch Heugeli"

Z Wätter isch em Name aui Ehr worde,bi verschneeiter Landschaft hei mir ir Chiuche z Grosshöchstette üses jährleche Adväntskonzärt gha.Trotzdäm vile Schnee hei hüüfe Bsuecherinne u Bsuecher der Wäg it Chiuche gfunge.

Mir hei üser Vorträg zum beschtä gä u hoffentläch dä Lüüt chönne e Fröid mache.

Ä Wiehnachtsgschicht vor Miriam,u diversi Chliformatione vo üs, hei der Aabe abgrundet.

Merci viu mau aune wo si cho iche lose u wünsche öich no e schöni Adväntsziit.

Am hütige Sunntigmorge si mir ume mau uf Adligenswil/Lu  gfahre für a üsere CD ga witer z schaffe.

Bi däm strube Wätter isch doch das grad ä gueti Beschäftigung gsi.

Mir hei üs bi dä Probe vorhär so guet wie müglech vorbereitet u flissig güebt, dass mir die vier Vorträg schön u suber chöi ufnäh u am Aabe ume Daheim si.`Mir si aui konzentriert am Wärch gsi u so isch dä Sunntig e churzwilegi Sach gsi. Z Üebe hetsech auso glohnt u d' CD isch am wachse...Danke Walti Fölmli, dass du dr Sunntig mit üs verbracht hesch.

Im Oktober isch das haube Jahr Probeziit düre gsi u es fröit üs sehr das Fuchser Mario vo Zäziwil nöi im Jodlerklub isch.

Es isch geng schön we jungi Lüt gärn düe Singe u üses Bruchtum wei pflegä.

Mario...schön bisch bi üs u wünsche dir no viu tolli Momänte im Klub.

Wöu üses Probelokal, z Pintli z Grosshöchstette, no Betriebsferie hett gha, heimer üsi Singprob bi üsem Presidänt, em Dänu Blum im Stau gmacht.Ar Vorschou,wis bi üs umenang heisst,heimer o grad chönne kontrolliere ob är t Chüe suber het gwäsche, wöu si am nächschte Tag z Chonufinge hei Viehschou gha.

Mo mou...glänzt u gstrahlet hets im ganze Stau, t Chüe si aui useputzt gsi.

Da darf natürlech e schöne Jutz nid fähle, so heimelig wis grad isch gsi...

Bi chli Singe u Jutze,es feins Würschlti u öppis z trinke ir Hang, was wotme no meh..

Mir Wünsche em Dänu viu Glück für e morgig Tag, u bedanke üs für die tolli Gastfründschaft.

Am Sundig Morge hei mir, wie aui Jahr am Bättag ,t Predigt ir Chiuche z Grosshöchstette Musikalisch dörfe umrahme.Isch mängisch nid ganz eifach, am Morge früech scho grad zwäg z si für es Lied oder e Jutz, aber im grosse u ganze isch es gloub guet acho.

Nachemne Stück Züpfe u ämne Glessli Wysse simer nähr ume richtig heizue.

Bi Kohler's z Niderhünige hei mir bi beschter Ussicht üse Jährlech Brätli Sunntig chönne ha.

Mit aune Häuferinne u Häufer, u de Theater Lüüt, hei mir bi wunderschönem Wätter chli Grilliert u öppis

z trinke hets natürlech o gä. So heimer üs no mau wöue bedanke für dä super Isatz wo si gleischtet hei a üsem Konzärt 2023.

Merci viu mau...

T Ching hei chönne spile, u die Eutere chli Singe u plöiderle. So isch de dä Sunntig grad mau düre gsi, u de isch me mit vouem Mage u viune schöne Idrück ume richtig Hei zue, ga der Tag la usklinge....

Das haube Jahr isch düre, u somit offiziell im Jodlerklub...

Der Samuel Siegenthaler vo Grosshöchstette

Sämu wird t Sänger im 2. Tenor ungerstütze.

Mir wünsche dir viu schöni u gmüetlechi Stunde, u das es no mängisch Luschtig zue u här wird ga.

Zum 20-jährige Jubiläum vom Pintli z'Grosshöchstette het üs z'Heidi am Donnschtigabe mit angerne Vereine, Lieferante und Stammgescht iglade zum Fiire. Es isch e sehr z'friednige u gmüetleche Event gsi u üs hets a nüt gfähut.

A derä Steu wette mir dir, Heidi, nomau DANKE FÜR AUES, wo du für üs machsch u Donnschtig für Donnschtig üses Gjammer muesch alose. Mir si sehr wohu bi dir u hoffe mir chöi no viu Jahr zu dir cho Probe.

Ä grosse Dank geit oh a dis Team, wo geng so fründlech u ufgsteut isch u mängisch o nach dä 22:00 Uhr nomau d'Fritteuse ahlat oder Glacechugle formt.

!DANKE VIU VIU MAU!

Üse letscht Uftritt vor dr Summerpouse hei mir no uf ungwohntem Terrain düre gführt.

Am Thali-Rock z'Schlosswiu hi mir üs zwüsche Schlagzüüg u Stromgitarrene igreiht. 

Für üs wie o hoffentlech für d'Bsuecher isch das mau öpis angers gsi u mir hi ä huufe postivi Rückmäudige übercho.

Itz wünsche mir öich ä schöne Summer u bis gli...

Rock 'n' Jodel

Ganz nachem Motto "Übe wie du kämpfst" hei mir üsi letschti Singprob vorem Uftritt am Thali-Rock dusse düre gführt.

Ufem Parkplatz bim Schützehüsli, hi mir bimä wunderbare Summerabe, üsi Jütz u Lieder über Höchstette igsunge.

Ä grosse Dank geit a d'Schütze für ihri Gaschtfrünschaft.

Am Mäntig, 26.06.2023, hi üs üser Jodlerkamerade vo Schüpbach zum aujähleche Brätle, das mau im Schützehuus uf dr Mutte, iglade.

Mir si, wie geng, flott bewirtet worde u hei eifach dörfe härehocke. Danke viu mau!

A däm wunderbare Sommerabe hi mir de natürlech o no chli zäme i d'Nacht iche gsunge.

Äs isch ä zfriednige u gmüetläche Abe gsi - Merci tuusig!

Äntlech, nach 30.Jahr schaffe mir wieder are CD vom Klub.

Am 22.06.2023 si mir am Namittag uf Adligenswiu zum Walter Fölmli greist. Guet vorbereitet hi mir die erschte zwöi Lieder uf üsi  nöii CD ufgno. 

Mit vouem Elan üebe mir für die witere Lieder u si schlussändläch gspannt uf üsi CD!

Jodle fägt!

Die ganzi Jodlerfamilie vom ehemalige Amt Chonufinge het sich am Samschtig z'Bowiu troffe.

Ei Klub umä anger het si Vortrag ire schön gfüute Feschthütte zum Beschtä gä. Mit Härdöpfusalat u Hamme hei mir üs d'Büch vou gschlage u hei no es Gsamtchorlied gsunge. 

Danke für die super Organisation u dä gmüetlech Abe.

Föteli finget dir uf Amtsjodlertreffen Konolfingen in Bowil (bern-ost.ch)

Am Samschtigabe si mir umä ih Car ihgstige u richtig Rickebach SO gfahre. Dert hi mir dr Jodlerklub Gäu Egerkingen bi ihrem Ungerhautigsabe dörfe ungerstütze. Ire voue Mehrzwäckhaue hi mir üs wie geng "ids Füdlä klemmt" u ds Publikum het üs ufmerksam zueglost.

Mir danke am Jodlerklub Gäu für d'Iladig, dä gmüetlech Abe u natürlech für die feini Verpflegig.

Ä grosse Dank geit o ah z'Carungernähme "Neukomm" für da ihwandfrei Service - mir hi chönnä ih- u usstige u üs ganz uf d'Jodlerei konzentriere.

Bis zum nächschte Mau...

Meh Informatione finget dir unger dr Rubrik -Auftritte / Jahresprogramm- 

oder www.jk-gaeu.ch 

Am Sunntigmorge am 06:00 Uhr isch üse Car z'Grosshöchstette richtig Bodesee abgfahre.

Nach knapp drü Stung si mir i däm Altnau bir Mehrzwäckhaue acho u si fründlech begrüesst worde.

Nacheme erschte Konzärtblock am Morge hets äs feins Apéro u äs wunderbars Z'Mittag gä. Am Namittag hi mir nomau mit de angere Klüb üser Lieder u Jütz zum Beschte gä.

Im Name vom ganze Klub wette mir dä Organisatore vo Härze Danke säge für die super Dührefüherig, für d' Verpflegig u für dä gmüetlech Sunntig.

Danke viu mau!

Unger dr Rubrik "Üser Uftritte u schüsch Heugeli" finget dir paar Ihdrück mit Föteli. 

Mir hi a Huufe nöii Föteli u Videos uf dr Homepage ucheglade. 

Göt doch mau i de verschiednige Rubrike chli ga schnöige...

O z'provisorische Jahresprogramm finget dir.

Am 5. März si mir zum Bispiu aus Gaschtklub z'Altnau im Öpfudorf iglade. 

Nach zwüne länge Jahr hi mir umä mau es Konzert u Theater chönne z'Obergoudbach ir MZH düreführe. Es isch nid lang gange u de het jede umä gwüsst, was er muess mache u wo si Platz isch - Glehrt isch haut glehrt.

Chömä äch de di Lüüt wieder? Oder hei si üs sogar vergässe? Isch z'Sofa gäbiger aus d'Feschtstuhlig?

Das hi mir üs geng u geng umä gfragt.. D'Närvosität isch oh grösser gsi aus angeri Jahr.

När isch es äntlech sowit gsi, no drzue dr Fritig dr 13., es isch achti gsi u dr Vorhang geit uf...

Läck, isch das schön gsi! Mir hi drü mau vore guet besetzte Merhzwäckhaue dörfe üser Lieder u Jütz zum Beschte gäh.

Mir hi üs ganz fescht itz "Füdli" klemmt u es ufmerksams Publikum het üs das danket.

Oh üser Theaterlüüt hei es ganz es luschtigs Theater dörfä ufführe u hei dir eint oder anger zum Lache bracht. 

DANKE, DANKE VIU MAU!!! Schön sit dir so zauhrich erschine u heit üs so ufmerksam zueglost.

Oh ä grosse Danke geit a üsi Jodlerfroue u zahuriche Häufer! Merci!

Witeri Föteli finget dir bi dä "Heugeli" 

Mir wünsche öich vo Härze äs wunderbars, erfougriichs u grossartigs Neus Jahr 2023 - uf viu schöni, unvergässlächi u singfreudegi Momänte im Jodlerklub Grosshöchstette. 

Äs Hoch ufd's 2023!

Nid vergässe - abem 04.01.2023 chöt dir öiiä Platz für üses diesjährige Konzert & Theater reserviere.

Äs würd üs sehr fröiä, viu vo öich z'gseh u ir Turnhaue z'Obergoldbach z'begrüesse.

Idämfau bis gli.. 

Ih üsere letschte Singprob, vom 15.12.2022, hei mir Bsuech gha vom Gsangslehrer, Erich Stoll. 
Er het üs spannendi u hiufrichi Atemtechnike u -methodene ufziigt u glehrt - äs isch für die meischte vo üs ä nöii Erfahrig gsi.
Mir danke am Erich Stoll ganz härzläch füre Bsuech bi üs in Grosshöchstette - äs het gfägt.

So schnufe mir itze richtig u korrekt am neue Jahr entgäge.. 

Mir vom Jodlerklub Grosshöchstette wünsche öich aune e bsinnlechi Adventszyt u schöni Feschttäg mit öine Liebschte.

U wär no kes Gschänkli het oder schüsch eifach öperem wet ä Fröid mache, für dä hi mir genau z'Richtige!

Neu chame bi üs Gratis-Itritte bsteuä.

Z'Stück choschtet 15.-Fr. + Versandchoschte.

Bsteuä chöit dir die direkt bimä Jodler vo üs, wo dir kennet, oder bim Peer Moser unger dr Telefonnummere 079 627 17 10.

Nach langer Ziit hei mir ändlech ume mau es Adventskonzert dörfe düreführe.

D'Chiuche isch bis ufe hingerletscht Platz gfüut gsi u mir hi üs aui ganz fescht itz Füdlä klemmt!

Näbem Klub hei o no drü verschiednegi Duett u Quartett mit ihrne Vorträg d'Chiuche verzouberet.

Üsi Märlitante d'Miriam het wieder ä wunderbari Wiehnachtsgschicht uf Lager gha u het diä üsem ufmerksame Puplikum dörfe verzeuä.

Mir danke vo Härze aune, wo dr Wäg i d'Chiuche gfunge hei. U dene, wos nid isch müglech gsi z'cho, giits hie es chlises Müschterli wie das öpä tönt het.

Häbit ä schöni Adventsziit u viellech bis gli a üsem Konzert u Theater vom 13.-15. Jänner 2023 z'Obergoudbach.

Am Samschtignamittag si mir zäme mit dä Auperöseler Heimenschwand im Car uf Dornach greist. Dert hei mir am Jodlerkonzärt vo dä Schwarzbuebejodler dörfä ufträte. 

Mir hei nid schlächt gstuunet, wo mir z'Dornach vor däm Goetheanum gstange si... so es spezieus Geböide het gloub no kenne vo üs gseh. Ganz e grandiosi Architektur!

Wo mir de äntlech dr Wäg uf d'Bühni hei gfunge, hei mir no grad mau läär gschlückt. E richtige Konzärtsau, wie im Fehrnseh!

Nachdäm mir üs langsam igläbt hei, isch es de o scho los gange.

Voreme ufmerksame Publikum hei mir üser Lieder u Jütz abwächsligswis mit dä angere Formatione dörfä vortrage.

Nachem offizieuä Konzärt hei mir ir Mensa vom Goetheanum witer gfeschtet u gsunge u si de zu später Stung mitem Car wieder daheime im Ämmitau acho.

Mir Danke dä Schwarzbuebjodler für d'Gaschtfründschaft u das bsundrige Erläbniss.

Am Samschtigabe si mir uf Iladig vo üsere Miriam uf Luterbrunne greist. Dert hei mir mit ihre u ihrne "Jodle fägt"-Kursteilnähmer:inne es Konzert/ e Üebig ir Chiuche dörfä gä. Es het, wies haut so geit bire Üebig, nid aus uf Ahieb klappet, drfür isches e sehr luschtige u gmüetleche Abe gsi.

Bim aschliessende z'Nachtesse hei mir üser Jodlerbüch gfüut u ab und zue no e Jutz gno.

Miriam, mir danke dir härzläch, dass du üs geng umä mitschleipfsch u motiviersch, oh wet üs mit settigne Aktionen geng chli us dr Komfortzone uselocksch...

Aber ig gloube, mir bruche das ä chli!

- Jodle fägt! -

Wie au Jahr hei mir am Sunntig d'Predigt musikalische dörfe begleite.

Es isch ä wunderbare Morge gsi.

Sit emä haube Jahr singt dr Bärnu Siegethaler scho bi üs im 2.Bass.

Es isch auso höchschti Ziit gsi, ihn ir vergangnige Singprob offiziell ih üsi Reihe ufznäh.

Bärnu, du bisch ä Bericherig für üse Klub u mir wünsche dir viu schöni u gmüetlechi Stunge bi üs.